在1988年買一件歐洲時裝,是這樣的……

撰文: 黃偉文

21 Feb 2017

frank-horvat-haute-couture-collections-paris-1951

在1988年,如果你在《Vogue》上面看中一套Romeo Gigli而想買下來,即使你願意付出金錢和時間,還是不一定能買得到,如果你有相應的人脈關係,好一點,但還是得靠多多的運氣。

– – 開季前 – –

是的,首先就算你誠意十足,不介意第一時間下訂金訂貨,對不起,你的「第一時間」其實並不是第一的,能夠有第二第三都算好彩了,因為比如3月的米蘭巴黎時裝節,經歐洲版的時裝雜誌報道,最快得五月號才出版吧,運到香港等那些專賣洋書的書店或攤檔賣到你手,恐怕已5月中了,品牌方在show後一兩星期一早截了時裝店買手們的order了!唔係點唧?人家最遲7、8月都要有shipment 了,遲一星期分分鐘已訂唔切布車唔切衫啦!所以除非你叻到有得飛去歐洲睇fashion show即場下訂,否則也不是你話訂就有得訂。

– – 開季中 – –

好吧,你等等等等,等到8、9月開季了,除了要一早到賣那件衫的那家店一早講低有Gigli返即刻打俾我(而人哋又真係記得/願意真係打俾你),即使你神心到一收到call即刻飛的士落中環買(注意,當時未有手提電話呀吓,call嘅意思係要覆call嘅call機呀吓!),最終決定你能不能買到心頭好,還是得看那家店buyer的品味,和店主的經營方針,否則你話靚那件buyer話唔靚,或者佢都覺得靚但老闆話好難賣所以唔入貨的話,你還是得個桔,所以說起來原來最靠的竟是運氣。

如果香港真的買唔到,你就手尾長囉。最直接聯想到的解決方法,當然是自己飛去米蘭搵,但即使你肯出錢出力飛去,還得去啱時間,一季六個月流流長,就算那家店真的有入那件衫,你太早到了未返貨,你太遲到呢又可能賣咗,專程飛去係咪都好搏吓先?

又或者咁,趁自己去其他地方旅行時搵,一樣係賭彩數,就算俾你僥倖撞到正,那時很多地方都打稅很重,運輸又貴,同一件衫在香港買可能已貴原產地七、八成,不幸在日本新加坡之類城市找到的話可能還要更貴一截。

如果真係咁desperate,或者你都不惜低聲下氣託剛剛好要出國的朋友「如果咁啱行開嗰頭就幫我搵吓啦唔使特登㗎」(其實當然是在懶溫柔地施壓)(所以那個年代因為託朋友買嘢而絕交的案例真是多現在十倍),不過就算你個friend真係夠義氣到肯花掉自己寶貴的假期時間幫你搵幫你買,在那個沒有smartphone即是不是人人隨手有相機的時代,你估你又有沒有本事交代清楚你要買的是哪個款那個色?萬一只有細一個或另一種色仲幫唔幫你買?如果價錢比你預算貴了二千蚊又去唔去馬好?都只能現場靠估。

聰明的你或者會說,其實先打個電話去品牌全世界的分店,及各地有carry呢個brand 嘅百貨公司、select shop,睇吓邊度有先派人去買咪得囉!喂大佬,你估好似而家咁有得上網一goo就google到地球上任何一間shop個電話號碼呀?有啲shop連佢係咪存在你都未知啦仲話check電話!就算唔知點解俾埋個冧把你,單憑口講你有無信心準確形容到係邊件衫一定唔會搞錯先?你表達能力強啫,對方又係咪一定理解能力好兼無語言不通呢?

– – 開季後 – –

終於在那個季度都找不到那件衫的你,如果剛過了季才在某家你意想不到的店找到減價貨你還買不買?如果已過季三年在某outlet shop中相遇呢?如果過了季十年才在專賣vintage clothing(兼仲炒高咗價錢)的店見面又點呢?

是的,在1988年你看中了一件歐洲時裝而好想買的話,以上就是有可能會發生的事情,聽完你會覺得好煩又好灰吖?還是很懷念那種想得到任何東西都得費好大把勁絕不輕易所以反而事事格外珍惜的日子呢?

先不用回答,下期我再寫寫《在2017年買一件歐洲時裝,是這樣的……》你看完比較一下才說吧。

▂▂▂▂▂▂▂▂_________________

WYMAN WONG 黃偉文

填詞人,其實最鍾意買嘢,最憎寫字,星期日盡可能唔寫字,去買嘢。

延伸閱讀

load more

© 2016 One Media Group Limited. All rights reserved.

地址:香港柴灣嘉業街18號明報工業中心A座16樓       電話:(852)3605-3705       傳真:(852)2898-2590

《明周》圖文均有版權,未經許可,不得轉載至任何印刷品或上載互聯網。如有侵權,本刊將循法律途徑追究。特此聲明。《明周》編輯部