不要「贈」我「品」!

22 Oct 2016

To have or not to have…

拒。絕。再。接。受。一。切。無。用。的。贈。品!!!

除此之外,別無他法!

所以覺得現在香港雜誌的贈品文化,其實比始作俑者日本更為文明。

至少你有權選擇不要。

雖然也真的很敬佩那些「得三蚊雞成本贈品」的想像力,但當人字拖和鎖匙扣和頸巾各自出過了五次,tote bag更是每一年三次之後,有時還真只想簡簡單單的買本「齋」雜誌,什麼附加物都不要,抬返屋企的重量事少,萬一那件贈品不合用兼送都無朋友要,帶回去又阻埞,丟了又浪費資源,而且事必經我手行刑「殺生」,也是業呀!在香港至少你能揀平20蚊的「無gift版」,多麼的環保又civilized!

另一個「減囤積廢物,先減贈品」的方法,一定是對shopping時唔啱用的禮品夠絕,即使售貨員盛意拳拳拎到埋嚟,但若果你一眼便「睄」到那件東西是你不會用的,便請馬上斷言說不,即使對方發功相勸「攞咗佢返去先送俾工人都好吖唔好嘥吖嘛」,你還是不能心軟,想想你家裏積埋嗰堆攞咗佢返去「先」但「先」咗一世都仲響度的廢物吧。

留我做個垃圾,長留戀於你家…

上面這句歌詞我還是一聽就想喊。更令人無法心狠手辣的雞肋,其實是那種「名名哋牌」的贈品,那種叫做有brand但又不是很名貴,但又不是賤到你馬上捨得當它廢物的東西,舉個例,我某個friend代言那家大型電器用品連鎖店送的運動品牌嘢或著名卡通人物嘢。

想「唔要」的時候,你又回心一諗「唔係嘅,可能會有親戚朋友鍾意嘅,不過一時醒唔起係邊個啫!」便一念之仁先把它帶回家……結果,鬼故一樣,入了去便從此沒有離開過了!

好吧!我自問段數有番咁上下,一般購物時的無謂贈品我早已練成「無動於中,埋唔到身」,最慘是參加名牌時裝活動時大會在門口發給的souvenir或者goodie bag!

動輒十萬八萬才開到單的頂級大brand給你的紀念品喎!我當然最想問吓工作人員入面其實係乜,免得我失禮地現場拆禮物,然後啱用就帶走唔啱用就立即物歸原主……是的,主要是怕重甸甸抬回家中才失望,更殘忍,也更憤恨自己浪費的臂力。

但好吧!即使贈品真是極不精美的超無聊東西,XXXX名牌喎,你真係捨得唔要?是的,我廚房儲物櫃頂還有把1998年的Christian Lacroix牛油刀,和它一班「光榮之家」的院友們擠在一起。

不過最最最令我進退兩難的「贈品」,都不是上述這些,而是長途飛行時航空公司送的overnight kit,像我這種頻頻撲撲的勞碌命,一年至少也有十次八次long haul flight了吧,當你和你父母和你兄弟姊妹家中那位家務助理每人都捱義氣幫你啃了十幾廿個啃到她們在馬尼拉老家的表舅父都有一個航空公司化妝袋,並開始面有難色地和你說:”Sir, no more la, please no more airline bag la!”的時候,你唯有告訴自己下次坐飛機時一定不要再攞啦!

係囉!我十年前已經叫咗自己唔好再攞做乜又再攞呢?因為我真係大頭蝦成日唔記得帶牙膏牙刷歐洲啲大酒店又成日唔問唔供應囉!因為我真係好想得到入面果對免費耳塞同眼罩但又完全唔想要其他嘢囉!

先此聲明,你們下星期在ebay淘寶看見有人放售沒有了ear plug和eye mask的航空公司過夜包的話,那個賣家不是我呀!

熱門文章

延伸閱讀

load more

© 2016 One Media Group Limited. All rights reserved.

地址:香港柴灣嘉業街18號明報工業中心A座16樓       電話:(852)3605-3705       傳真:(852)2898-2590

《明周》圖文均有版權,未經許可,不得轉載至任何印刷品或上載互聯網。如有侵權,本刊將循法律途徑追究。特此聲明。《明周》編輯部