黃偉文專欄:白T之夏

撰文: 黃偉文

21 Jul 2017

今年夏天,只想日日著白Tee、乾淨、麻甩、timeless、唔駛襯!

如果你話「唓,我年年夏天都係咁㗎啦!」咁你好man囉,好boyish囉,好叻囉,或者信心好大囉。我自問條件唔係咁好,所以唔係成日都夠膽囉。

我上一次戚起條筋夠薑成日白Tee的夏天,係20年前囉。

1997 · 2017

真的不是因為我份人太孔雀才不甘心只穿平凡的白Tee,而是因為……或者應該這樣說,我覺得「穿白Tee」其實是一種「心理狀態」,與「潮流」那個「潮」無關,與「心血來潮」那個「潮」才有關,而我的漲退,剛好20年一個周期,也不是我能控制的。

1997年那個白Tee之夏,咦~好老土唔想講,不過咪又係同失戀有關,於是咪懶萬念俱灰洗盡鉛華,事實上唔開心到唔想扮靚當然也真是到了危險的臨界點,假如那個底衫look冧莊到1998,應是生無可戀的最後警報了,若是這樣,這個人也不能有1998了,幸好……我的物欲在秋天就回來了,真的要講句「多謝Parco!」涉谷果間!當然還有Harrods和老佛爺和Barneys New York和Joyce……

放”pair”都有三分醒,當年促成這次白衣修行的,或者還有地獄式減肥,是的,香港回歸那年是人生最瘦,褲頭跌破30吋,著乜都得啦,潛意識的自我防衞機能那才會開綠燈,准自己著得咁簡單咁少布,咁少少肥肉都無所遁形吧!

至於2017的今天,理由是相反的。我不算是Oprah Winfrey的粉絲,但好記得多年前她修身反彈後悟出了真理,說過類似的話:「當你100、105、110嘅時候,你係乜都唔著得嘅,因為你真係斤斤計較,食多啖飯跑少哩路體重上升一安士都嫌自己漲爆!但當你已經180、190、200磅嘅時候,你反而乜都著得!反正都一樣啦,唔豁出去就笨啦!」

真感恩近年我經常有與時裝有關的工作,那顆想打扮的心已得到充分餵飼,不用開工時反而想故意放空輕鬆一下,閒時重啟「白T之夏」這個mode真是休生養息有益身心,反正每次去完fashion week那種密集式扯到「衡」的日子,回來我總要「自暴自棄」一段日子唞吓氣,今次不過把那個不肯打扮的「萬念俱灰周」延長進行而已。

簡約主義之天時地利人和

要做得成「白T之夏」,其實都要睇睇個天,至少祂要賜你運氣,搵到一件夠好可以日日著出街當主角的白T才可以,不,不是一件,要一批先得!

唔容易㗎!比如我,考核的項目是頗多的,先說cutting,衫身和袖口的長短闊窄都是關鍵,太長又鈍太短又露肉太多,太闊唔smart太窄又顯肥,還有領口那個圈橡筋粗幼是否合適又是否悅目,都足以影響總評分。

當然還要看這件衫夠不夠白?會不會太透明?著感會否太硬太拮太「鞋」太焗太polyester?可不可以機洗?洗完會否太走樣?大概可以穿洗穿洗穿洗穿洗穿洗穿洗幾多次才玩完?……這都是需要逐件買回家試穿兼試洗(有時還得買埋對上對落兩個sizes),比較之後才能下的重要決定!

好不容易找了一件真命天衣了,回去再買又發現被discontinue了也是常有的事,但就算貨源充足任你買,如果訂價三千蚊一件,你又捨不捨得買定一打替換穿足一個summer呢?所以價錢合理和返轉頭買得返也是很重要的條件。

信我,那個dream model不是年年都能找到的,找到了請好好對待它。

1997年我找到那個型號是P字頭的,雖然我都嫌衫腳有個小小的logo,但已是我在當年那個沒有網購的世界中找到的「最好」了。後來當選過的順序還有本地I家的,美國G家的,又再過渡至美國J家的,終於最近找到了一款又是來至G家的,我馬上回去買了4打,因為折實79蚊件好抵。

至於款式,我其實最愛真係乜花臣都冇的全棉白Tee,但近年中棕的兩款都是胸口有個袋的white pocket tee,本來有點嫌不夠minimal,後來終於想出一個開解自己的方法:至少飛釘露點露一邊都好過露兩邊囉!

延伸閱讀

load more

© 2016 One Media Group Limited. All rights reserved.

地址:香港柴灣嘉業街18號明報工業中心A座16樓       電話:(852)3605-3705       傳真:(852)2898-2590

《明周》圖文均有版權,未經許可,不得轉載至任何印刷品或上載互聯網。如有侵權,本刊將循法律途徑追究。特此聲明。《明周》編輯部