【創新斗室】港版貨櫃屋會好醜?外國前瞻例子回顧

撰文: 葉青霞     攝影: 網上圖片

27 Sep 2017

「我要用個貨櫃裝住財產。」呢句明顯外露霸氣。
「我要用個貨櫃裝住性命。」呢句似乎內藏淒涼。

住棺材房,我們活得如死人一樣;居貨櫃,我們活得像死物一般。面對住屋,「香港人」呢個物種,變得神奇頂級超卓!

科學園及香港大學宿舍將試行「單元預製」組裝技術起樓,以圖解決住屋問題。不專業超粗疏形容:即係層層疊向上裝嵌預製的「貨櫃屋」,比傳統興建模式快得多。發展局局長黃偉綸出來大派定心丸,話:「唔係鐵皮貨櫃加冷氣就叫貨櫃屋。」呢批房屋有個宇宙級具創意的名字:「創新斗室」!

101

2015年在紐約落成的「貨櫃屋」兼顧功能與美感。

AaaM 建築設計工作室由三名建築師組成,經常在專頁談論本土建築及空間設計。日前他們因應事件出post:「如果政府講嗰啲貨櫃屋起到咁我又唔拘喎。」並貼了紐約類似概念的房屋相片,設計有型,在城市矗立毫不違和。可以入住,簡直係呢個時代嘅幸福。AaaM建築師之一彭展華(Bob)說:「香港嗰種可能會醜到……難以想像,或者會搞到似貨櫃場?不過「創新斗室」呢個名又似乎唔係貨櫃場嗰種。」

105
AaaM 建築設計工作室的彭展華(中)認為建築的成功不在於它的基礎結構,而在於設計要夠創新。

創新?邊度創新呀?睇過。Bob說:「組合式建築上世紀五六十年代已經流行,因為二戰後人口膨脹,須快速建造大量住宅。比較概念性嘅有英國嘅Archigram,佢哋提出的Plug-In City、Walking City等想法,認為城市可以由一堆活動式建築物組成,比較前瞻。日本代表就有Nakagin Capsule Tower(中銀膠囊塔),由工廠預製件組成,十三層總共一百四十個單元,只係花咗三十日就搞掂。」
102

Archigram為1960年代的實驗性建築團體,批判現代建築主義建築,提出Plug-In City、Walking City等想法,建築可隨人口密度靈活變更,極具彈性。

103

由黑川紀章設計的Nakagin Capsule Tower(中銀膠囊塔)是住宅加辦公建築,位於東京,共有一百四十個預鑄建築組件,每個單位都可獨立更換。

新界充斥劣質貨櫃屋可供租用,普遍人對貨櫃屋印象不佳。「貨櫃內外其實可以處理得好好,如日本橫濱嘅Bayside Marina Hotel就係一個好例子。低成本興建,但設計得好好,完全唔似貨櫃屋。」Bob認為貨櫃屋方便層疊,能快速建造,作為過渡房屋值得考慮。「政府提供多一種房屋類型係好事。」但他擔心香港版就只是一個住所,而非宜居的住所。
104

「貨櫃屋」可以完全沒貨櫃味,日本橫濱Bayside Marina Hotel便是一例。

政府一向直線思考,住屋規劃一樣直向發展,欲住多啲人,起多幾層樓。「創新斗室」起夠十八層。Bob建議:「其實組裝方式好多,橫向四五層一樣得,解決住屋空間之外,可以當係俾年輕人唔同嘅居住環境。」

熱門文章

延伸閱讀

© 2016 One Media Group Limited. All rights reserved.

地址:香港柴灣嘉業街18號明報工業中心A座16樓       電話:(852)3605-3705       傳真:(852)2898-2590

《明周》圖文均有版權,未經許可,不得轉載至任何印刷品或上載互聯網。如有侵權,本刊將循法律途徑追究。特此聲明。《明周》編輯部