【真本土】 得獎攝影師廿萬照片 揮寫屋邨進化史 - 明周文化

【真本土】 得獎攝影師廿萬照片 揮寫屋邨進化史

撰文: 葉青霞     攝影: 關震海、受訪者提供

22 Mar 2018

人人都影公屋,唔通人人都識影公屋咩? (俾我老套一次,馬騮掩面)

彩虹邨與南山邨被IGer相中成為佈景板,你影我影,加個filter落堆#,我po你po,但有幾多人知道這兩個屋邨的歷史?梁瑋鑫(William)初中起走遍香港二百多個屋邨,從菲林到數碼,由少年變壯年,拍了廿萬張照片,對每條邨的建築特色與歷代變化了解到深深深處,就連平面圖他都珍而重之。我笑他毒,他說:「確係有啲。」

101William希望將來能出版一本圖文集,把他二十三年來拍下的珍貴屋邨畫面留個實體記錄。

拆卸,重建,老去,翻新,廿年公屋變遷不知幾許,他選擇用相片及文字,花了二十三年為一半香港人的棲身之所做記錄,在Facebook立有「香港公共屋邨圖片集」專頁,圖文並茂送上屋邨知識。最近他的一幀《天梯》得到攝影大賽獎項,相中特寫的是沙田乙明邨特別的「外露式樓梯」。

「外露式樓梯更早見於彩虹邨,彩虹邨六十年代由屋宇建設委員會(房委會前身)興建,建築成本比同期的徙置區及廉租屋高,係所謂嘅高級公屋。八十年代房協起嘅乙明邨採非標準設計,外露式樓梯係一大特色。」William一答如同在播有聲教科書,資料大量。他再講Y型、和諧型、井字型……開了掣,停不了口。

102William以一幀「公屋相」《天梯》獲得國家地理(National Geographic)會德豐青年攝影大賽「香港地」組別佳作獎。

位處城門河畔的乙明邨採高低座設計,令樓宇不會密如屏風。「起公屋唔使話一定要用盡地皮起好多單位,比較以人為本。但現代起公屋就多從經濟角度諗,無咁講究建築美學。」首次到訪乙明邨的記者對邨內一幢幢大廈的簡潔線條眼前一亮,尤其那戶外樓梯。「得獎嗰張相有一層有人掠衫,雖然無人,但正正係一個好日常生活嘅畫面,相有一半睇到藍天,我想表達嘅係即使我哋生活空間好細,望出去其實是個好廣闊嘅藍天。」侷促的石屎森林,放眼仍然盡是唞氣位。

當你(我係)以為佢一定係喺樓梯踢波落樓嘅屋邨仔,先至對屋邨有咁大情意結,佢其實從無住過公屋。佢細個沙田區居屋,經常跟阿媽「跨邨」到乙明邨百佳購物,流連各邨文具舖,對屋邨毫不陌生。「加上我星期六有時會留宿婆婆屋企,佢住慈雲山徙置區,慢慢我發現屋邨生活氣息好強,婆婆會同鄰居打麻雀,會有人叫賣豆腐花,有太太會將衣車搬到電梯口做縫紉。」這些情景大概是七八十後公屋居民的集體回憶,即使沒住過公屋,可能都從《富貴逼人》等港產片略知一二。

自此他就中了公屋毒,搭車會把握機會問爸爸屋邨名字,報紙有屋邨新聞他就興奮,有相的話倍感雀躍。「小學有科叫社會,嗰本課本會講香港社會發展,內頁有好多公共屋邨圖片,我到依家仲保存喺床下底。」

110

至九十年代,初中的他閱報發現很多公共屋邨納入重建名單,於是按報章清拆列表,拿着地圖逐一親身探索。「第一次去嘅係黃大仙上邨,攞住部儍瓜機,想記錄佢就快消失嘅畫面。」秀茂坪邨、葵涌邨的最後景象他都拍下了,一直都採純記錄形式。去到千禧年代,數碼相機普級,不用再沖曬相片,影相成本下降,他也到不在清拆名單的屋邨拍攝。「開始從建築美學角度去睇屋邨,亦留意裏面嘅人文風景居民生活嘅畫面。」他的鏡頭凝住了在跑的小孩、在走的貓咪、在飄的衣物,還有伯伯下棋與婆婆納涼,又或者天晴、雨後、黃昏、晚間的同一座屋邨。「我影嘅都係一啲好平凡好尋常嘅畫面,會講究構圖,但唔追求要玩好多攝影技巧,我追求生活感。我唔會打擾居民嘅生活情景,盡量用一啲輕巧相機,甚至手機當自己隱形。」

%e4%ba%ba%e6%96%87%e9%a2%a8%e6%99%af-2屋邨居民才是相片的主角,為了讓畫面自然,他很少與人溝通,每每低調拍攝。
%e4%ba%ba%e6%96%87%e9%a2%a8%e6%99%af-4屋邨各式各樣的曬衫情景他都喜歡攝下。
%e4%ba%ba%e6%96%87%e9%a2%a8%e6%99%af-5屋邨的平台、街市、小店都是他經常的取景地。
108房協有「房屋實驗室」之美名,興建之「非標準設計」屋邨包括葵涌祖堯邨,是全港首個設有泳池的公屋,名字取自房協創會委員關祖堯爵士。
103中二時,他拿着爸爸的「儍瓜機」走到快將清拆的黃大仙上邨拍了這張純記錄,沒甚麼構圖的照片。

每隔一段時間,這個「隱形人」都會重返去過N次的屋邨繼續按下快門。「我喜歡影變化中嘅相,一段時間後再去同一屋邨同一位置影,同之前嘅相對照好有趣,會發現微妙嘅變化,例如外牆已經髹上另一種顏色。」每當屋邨有翻新計劃,就是他再去之時。在專頁把圖片一併展示就能帶出前後對比。圖片旁附載的文字是他多年來搜集資料的結晶,隻隻字都用時間精煉出來。「我會專登去歷史檔案館睇當年嘅規劃資料,收集公共屋邨設計平面圖,呢方便都真係幾毒。」

%e6%9c%aa%e5%91%bd%e5%90%8d_meitu_0瀝源邨榮瑞樓面向沙燕橋的外牆本是繽紛波浪加上小魚圖案,巨形「壁畫」一直是瀝源邨經典。2014年屋邨重新粉飾,小魚變成深海大魚,新舊圖拼在一起,對比一目了然。

近五、六年,香港人本土意識提高,較珍惜具香港情懷的事物,包括舊式公屋。「之前拆咗Y形設計、60年代落成嘅蘇屋邨都覺得有啲可惜。蘇屋邨唔似香港公屋,設計似西方私人樓,好特別。令人安慰嘅係房屋署重建屋邨時,保留「蘇屋三寶」,包括小白屋、燕子亭同金漆大門牌,亦保留咗楓林樓最低兩層,將來用作蘇屋邨展覽廳。」他日居民走進新屋邨,還能感受昔日畫面,他認為雖然不能整幢大廈保留,但在發展與保育之間,也算取捨得宜。

%e8%98%87%e5%b1%8b%e4%b8%89%e5%af%b6-1蘇屋三寶──小白屋
%e8%98%87%e5%b1%8b%e4%b8%89%e5%af%b6-2蘇屋三寶──燕子亭
%e8%98%87%e5%b1%8b%e4%b8%89%e5%af%b6-3蘇屋三寶──金漆大門牌
%e6%a5%93%e6%9e%97%e6%a8%93-%e4%bf%9d%e7%95%99-1新建單位前保留楓林樓最低兩層,將來用作保育展覽廳。

其他影片

fhc_2784

【真本土】拆牌改街名?馬冠堯:街道名字代表了整個香港的歷史

城市焦點

facebook-banner

【真本土】你做咩唔笑?回顧新春大電影 - 2018我們要看電影還是賀歲片?

文化

topso

【真本土】廣東話不只是俗 為古代潮語留一盞燈的人-蘇萬興

城市焦點

nepal01

【真本土.不是異鄉人】兩代尼泊爾人胼手胝足 打破種族藩籬

城市焦點

load more

© 2016 One Media Group Limited. All rights reserved.

地址:香港柴灣嘉業街18號明報工業中心A座16樓       電話:(852)3605-3705       傳真:(852)2898-2590

《明周》圖文均有版權,未經許可,不得轉載至任何印刷品或上載互聯網。如有侵權,本刊將循法律途徑追究。特此聲明。《明周》編輯部