金馬獎最佳動畫《大世界》如果惡無惡報 你仍會揀善嗎? - 明周文化

金馬獎最佳動畫《大世界》如果惡無惡報 你仍會揀善嗎?

撰文: 葉青霞     攝影: 電影插畫

24 Jan 2018

唔知閣下有冇同感:看中國新聞,如進怪奇大觀園,嗰種荒誕有時叫人笑出七公升眼淚,有時令人浮現七億個黑人問號,雖則我明白一樣米養七百樣人,但仍然要借用周星馳電影對白表心聲:大佬呀,你唔好咁黐線啦﹗

今屆金馬獎最佳動畫《大世界》有好多呢類人物,而其實導演劉健本身都好癲,修讀中國畫嘅佢異常執著,捨真人製動畫,是為了可以全﹗權﹗控﹗制﹗佢堅持兼任編劇、畫圖、剪接、配音、畫分鏡圖、做動畫等工作。片中每幅,係每幅圖都出自佢手,用上麻甩日漫風格,花上千日建構大世界,照見人性貪嗔癡。《大世界》係首部中國動畫長片入圍柏林、康城及威尼斯三大歐洲影展,我覺得完全合理。

101

103

102

這是一個關於人民幣蔽人民的故事,被蒙蔽的,是良知。故事背景係中國南方一個邊緣城鎮。劉健細心畫下那種永遠發展中的狀態,倒模建築、假大空標語、販賣歐洲氣派的吹牛廣告牌,都有如實地取景,刻劃精準。城鎮好灰,毫無生氣,人人厭世mode on,唯一令佢哋醒神嘅,係錢。

小張女友因趕潮流整容失敗,小張為咗帶佢去韓國再做整容手術而搶走老闆一百萬現金,然後一個又一個人都盯上這袋錢。擄劫小張已屬碎料,有人甚至已打算置佢於死地,人性界線遇錢即退,在這個國度,sad but true。新聞常看到有人為丁咁多錢做出傷天害理、死十次都唔足以懲治嗰種惡行。在2D世界,觀眾看到4D的人。

104

大家以為搶到錢就可改變現狀,不惜代價。有情侶「夢想」到香格里拉養豬,很荒謬吧?中間加插MV,畫風用色加倍誇張,而且加入具文革色彩嘅畫面,有驚喜。全片對白寫得荒誕不經卻恰到好處,有幾段我笑到出眼紋,但完場後心卻好酸。小角色講嘅對白,聽落不着邊際,實質句句有意思,反映民眾到底諗緊乜。背誦成功人士金句卻記到亂晒籠、討論佛與耶穌邊個犀利啲、侃侃而談菜市場自由論等等,諷刺呢就兩茶匙,仲有啲幽默㖭。

入場前請有心理準備畫作動的部分唔多,圖與圖之間未必好順暢,唔好用3D動畫去比較;配音也明顯業餘,因為冇乜資金,導演自己一個人配咗三個角色,再搵朋友下海幫手,但呢種raw配合畫風及離譜劇情,反而好有化學效果。

結局帶點宿命主義,現實中你會希望個天真係咁安排,可恨惡有惡報,從來很少發生。

《大世界》
1月特別放映@百老匯電影中心

熱門文章

延伸閱讀

load more

© 2016 One Media Group Limited. All rights reserved.

地址:香港柴灣嘉業街18號明報工業中心A座16樓       電話:(852)3605-3705       傳真:(852)2898-2590

《明周》圖文均有版權,未經許可,不得轉載至任何印刷品或上載互聯網。如有侵權,本刊將循法律途徑追究。特此聲明。《明周》編輯部