桌上立法會選戰遊戲 有票先要有錢

撰文: 葉青霞     攝影: 周耀恩

21 Oct 2017

101「選舉工程」桌上遊戲分入門及進階玩法,進階版甚至有落區宣傳概念,適合二至六人玩,一局大約玩廿五分鐘。$328

選舉是香港式戰爭,鬥資金雄厚,鬥人多勢眾,心計不如會計,算到如何啱啱好比對手多票,就夠。兩個九十後繼去年眾籌推出七彩港鐵啤牌,再設計出有關香港選舉的 board game,偏偏無乜點抽政治水份,只望大家逆轉角色,換上候選人大腦,反思選舉工程。

即使我哋心底幾咁想 DQ 長期成功爭取閉目養神嘅立法會議員,都只係得個諗字。票都無得投呀大佬,功能組別於我等蟻民幾乎係零功能組別呀,DQ?有資格咩?扯遠咗,返返嚟,選舉桌遊同政治無關?正所謂買棵蔥都係政治喎。設計師之一黃梓峰(Princeton)說:「遊戲其實無刻意同香港現實情況扣連,好多 board game 都同戰爭有關,但放喺香港唔合適,就諗香港有啲乜係有競爭性,先諗到選舉。我哋反而希望抽離少少睇香港選舉制度,放眼世界唔同模式嘅選舉。公平選舉點定義?最多票就係最多人支持?當我哋逆轉為候選人,就能從對立位反思唔好咁易被操縱。」港式選舉,根本要預設將來入到立法會投票都影響唔到大局,全面直選到底幾時兌現?又拉遠咗,遊戲係睇邊個玩家最快搶到五大選區20張票為贏,分地方直選及功能組別。「功能組別簡化到只得七個,否則就太複雜。」唉,寧願現實無㖭啦!Princeton 續說:「到底係咪個個都知功能組別係乜?有乜組別可能好多人唔知。」

102創作「選舉工程」桌上遊戲的Kenny(左)及Princeton都是中文大學學生。兩人一個讀會計一個讀化學,卻希望成為本土桌遊設計師。
104地圖上的交通幹道都依照香港的現況設計。
103區域卡左下角顯示當區地標,現在兩位設計師都變成香港景點專家。

 

要票就要有錢

Board game 最引人注目係顯示 150 幾個區域的七彩地圖。另一設計師莫景誠(Kenny)說:「地圖盡量如實反映立法會選舉嘅選區界線。我哋好鍾意地圖,一直好想設計有香港地圖嘅 board game。」真實選票難得,遊戲選票一樣難求,要先抽區域牌,再用棋子在地圖上逐格前行到該區,要跨區嗎?還要付錢搭車搭船,所以話有票嘅前提係要有錢!

炫目地圖固然搶眼,區域牌一樣有細節位要人動用金睛火眼。每張牌左下角印有該區地標圖案。「希望大家了解多啲每個區,例如馬鞍山有旋轉木馬,真係有得玩,可能好多人都唔知。」屯門有人騎牛(笑),馬鞍山真係有馬騎?記者真係覺得學到好多嘢。當香港傳統景點險被鄰近經濟強國子民踩至陸沉,佢哋寧願介紹更多香港人有共鳴的地方。

上回二人推出港鐵站啤牌,在眾籌平台 KICKSTARTER 超額認購多倍,原來好多家長當係知識卡讓仔女學認車站。似乎今次地標建築圖案卡一樣有可能令呢個選舉game變成家長眼中的通識遊戲。

預訂網址:https://goo.gl/nxBr3D

105去年二人在 KICKSTARTER 眾籌推出港鐵車站啤牌,有多種玩法。除了吸引香港買家,更有不少來自歐美、日本、韓國的外國人購買。

 

延伸閱讀

load more

© 2016 One Media Group Limited. All rights reserved.

地址:香港柴灣嘉業街18號明報工業中心A座16樓       電話:(852)3605-3705       傳真:(852)2898-2590

《明周》圖文均有版權,未經許可,不得轉載至任何印刷品或上載互聯網。如有侵權,本刊將循法律途徑追究。特此聲明。《明周》編輯部