黃偉文專欄:「千古懸案系列」之 Polo Shirt 條領反唔反? - 明周文化

黃偉文專欄:「千古懸案系列」之 Polo Shirt 條領反唔反?

撰文: 黃偉文

19 Mar 2018

101
101
101
101

無錯,就係最最最Basic的這條題目:

Polo Shirt條領到底應唔應該/可唔可以反?

或者你會覺得,作為一個買衫資歷「年近半百」,寫時裝專欄也十餘年的人,如我,不是一早超過了回答這份相等於《時裝入門101》初級考卷的時間,現在挖番出嚟反而有點不必要地自己衝下去降班吧?

正如很多導演和演員都想在職業生涯中用自己的方法挑戰一次莎士比亞劇,很多大廚都希望於有生之年炒出一碟無懈可擊的乾炒牛河,我覺得呢,fashion columnist呢,點都要正面回答一次這條千古謎題才算考牌成功,即使價值觀一面倒,每人的理據總有不同吧,不能因為怕被看倌識穿自己的底牌,而永遠逃避示範一些最易穿崩的基本動作!

來吧!

Polo Shirt條領反唔反?

第一步,先改問題,或者說「先把問題問好」。因為你願意回答一條怎樣的問題,就反映了你是怎樣的一個人。

我不會助長「Polo Shirt應唔應該反領?」這種批判性思想,因為我覺得時裝(和人世間的審美)本來就沒有永恆不變的所謂「絕對的對」。你其實做乜都得,做乜都不會也不應該受到任何形式的制裁,所以我基本上也不贊成所謂「品味」這種少數被迫服從多數的俗世概念。

我比較信奉的是,著衫啫,你自己喜歡就得,你也有權不喜歡別人這樣那樣,但你也必須承受得起別人對你這樣那樣的不喜歡,完。

所以以下陳述的,只是個人喜好的表態,不是大石砸死蟹的model answer。記住,你和我都不是model !

我唔鍾意著Polo時反起領,因為我認為designer在設計Polo時未必有提供俾你「豎起條領著」這個選項,所以衣服的天生結構並不支援這個著法,換言之,夾硬反起的話會「軟奶奶」和形狀不規則,而在我眼中這樣是唔靚的。(換了是質料上較厚較硬的大褸反領我便很OK,甚至很多時候會覺得在觀感上很挺拔的大衣領子,容易幫穿者投射出一種好精神抖數和很英明威武的印象!實際上暖啲擋風啲就唔在講啦。)

我不用「應該」來討論Polo反領,是因為我有問過自己,即使用我自己喜歡的這種審美觀作延伸,有沒有任何情況下「Polo反領」是可以成立的?

答案是有的!而且也不難想像。

什麼時候「Polo反領」可以成立?

虛無飄渺點講,主流審美其實是不斷變化的,重點是「見得多就慣」甚至「見得多就靚」,舉個例,公司有個新同事第一日返工,你一望覺得嗰個樣巖巖巉巉,但日對夜對共事三年後,如果佢份人唔乞人憎啦吓,有一日你突然會發現佢唔知點解望望吓「順眼咗」「其實睇真都唔係咁樣衰吖」!

又舉個例,朋友四歲的女兒說當紅的某女藝人A「好靚」!我第一反應是唔係啩,她十幾年前初出道時,人人都覺得她才藝不錯但相貌就……「爭少少」,但你想一想,那位小女孩自出生懂事開始,身邊所有人便告訴她A代表了最好最叻最勁最「靚」,於是A就令個「靚」字在下一代改寫了,扭轉了人間的審美觀。

換言之,如果那些喜歡Polo反領的人一直幫自己的兒女洗腦,而勢力大到東風壓倒西風,那麼30年後可能主流大眾會覺得「Polo唔反領先至唔靚」!

另一個可能是,如果明年有個隻手遮天的大牌子或當紅designer決定「玩bad taste」,化醜為靚,那麼搞搞吓也隨時能顛倒乾坤的。

不是早幾年有些前衞革命性品牌玩Kitsch,於是大家漸漸又開始接受了「太陽眼鏡鏡片上個嘜頭貼紙唔搣」和「新西裝褸袖口個招牌唔拆」這些以前很多人視為「品味死罪」的Absolutely No 嗎?

如果Balenciaga的Demna Gvasalia和Gucci的Alessandro Michele決定整蠱你哋班友仔,明年夾手夾腳大推「Polo反領」,我敢寫包單今日站在品味高地鬧得最大聲的那批人,起碼有九成漏夜變節,將馬球恤那條「軟奶奶」的領,違反地心吸力地反得比誰都義無反顧!

所以我不會把「Polo Shirt不應該反領」設得那麼實牙實齒,免得令自己他日難為情!

況且,活在這個時勢,上社交網路太多的我,都一早習慣了很多人但求過癮其實pointless 的「為反而反」了吧!

熱門文章

延伸閱讀

load more

© 2016 One Media Group Limited. All rights reserved.

地址:香港柴灣嘉業街18號明報工業中心A座16樓       電話:(852)3605-3705       傳真:(852)2898-2590

《明周》圖文均有版權,未經許可,不得轉載至任何印刷品或上載互聯網。如有侵權,本刊將循法律途徑追究。特此聲明。《明周》編輯部