黃偉文專欄:徐小鳳 啟示錄 - 明周文化

黃偉文專欄:徐小鳳 啟示錄

撰文: 黃偉文

11 Oct 2018

呢條黑白波點裙不但係註冊商標兼搵食架生,佢仲令「徐小鳳裙」成為咗民間稱呼呢種誇張晚裝嘅代名詞,好多人買飛入場都只不過係想一睹呢條世紀名物嘅風采,睇唔到唔安樂。

日本另一位老牌歌后小林幸子,以前她每年一月一號紅白歌合戰才拿出來,那條一路唱一路充滿機關變化的「衣裳對決裙」,元旦之後她一整年都要帶着去不同地方登台「謝票」的,fans睇show要是看不到這套衫的真迹是要回水的!

早前Kanye West不知從哪裏弄來一件2001年的Vintage Raf Simons迷彩外套,穿著公開亮相了,馬上便有人拿出同款古董在網上拍賣,並以近40萬港元成交!

回到那個「唱舊歌得,咁點解著舊衫唔得?」的議題上,為什麼2007年Moving on開場那套白色婚紗今日不可以攞返出來著,大家當經典來重新欣賞呢?

不算徐小鳳的die hard fan,所以無法提供確切的日期(考古方面麻煩真粉絲代勞,謝謝),但印象中早在她悠長假期「復出」那個2005的演唱會前(她對上一次開show是1995),天天后已經淡定優確地向大家展現「流行歌手做show唔換衫」的可能性,簡直是對香港娛樂事業那個成了文的不成文規矩正面宣戰。

「係呀,我係次次都唔換衫著返同一條波點裙呀,吹咩!」(設計對白)

「指定動作論」

當然有些事情,德高望重者可以「以身試法」挑戰主流,並且施施然免罪離場,分分鐘仲有大把人讚勇敢創新不落俗套,換了另一個身份地位累積不到這高度的「新人」做一模一樣的事就立刻被最餓鬧人的觀眾網民剷到過對面海。

所以Paula姐的危險動作你們先別急着抄,娛樂世界不是法庭,有先例可援不等於可以逍遙法外。因此莫講話鄧小巧小塵埃這些資歷較淺的真正小朋友不要魯莽抄阿姐唔換衫,大如容祖兒鄭秀文照做,我覺得都唔一定「無罪釋放」。

但至少有徐小鳳行了第一步,開了條血路大家可以等機會慢慢嚟。

我覺得小鳳姐的唔換衫哲學起碼包含了兩個部份:

①人,無可能著乜都靚!就算Super-model底子,至少有一兩個款著得特別靚,或者特別受到觀眾喜愛吧?如果好彩找到了這套「人生飲衫」,點解仲成日換來換去唔日日著住?因為人言可畏而換500套70分嘅,而唔信吓自己打死唔換不斷重複著同一套100分嘅?

② 喂,呢條黑白波點裙不但係我嘅註冊商標兼搵食架生,佢仲令「徐小鳳裙」成為咗民間稱呼呢種誇張晚裝嘅代名詞,仲有仲有,仲簡直係香港「名勝古蹟」之一,好多人買飛入場都只不過係想一睹呢條「物質文化遺產」嘅風采,睇唔到唔安樂,你居然要我換。(雖然據知小鳳姐其實咁多年嚟同款做咗幾十條來替換。)

又再舉日本另一位老牌歌后小林幸子做例,以前她每年一月一號紅白歌合戰才拿新款出來,那條一路唱一路充滿機關變化的「衣裳對決裙」,元旦之後她一整年都要帶着去不同地方登台「謝票」的,fans睇show要是看不到這套衫的真迹是要回水的!

只有笨人才天天新款

之前我有另一篇文章寫過,只有最戇居的新娘才會在理論上「一生人最美」的出嫁日,試些未試過所以沒有100%把握不出事的新化妝新髮型新裙款,換了是我,一定著舊的,一定揀自己有生之年最多人讚過靚的那個妝那個頭那款衫,在最重要的個人大show中才必定不失手,盡情收割大家的讚美!

永遠有成team人在背後發功的明星歌星們,尚且因為貪心試新嘢(或者受不住輿論壓力而唔換唔得)而時時瀨嘢,更何況我等好日都book一次髮型師化妝師的「平民」?

另一個我盡可能用舊嘢唔想換的一定是「舊鞋」,很多人知道我是某牌某型號波鞋的長期支持者,簡直視為「本命」,即使每季去fashion week都一定要有對傍身,出外旅行不在話下。試過有次去西班牙玩,決定鬥鬥氣一反常態,帶了兩三對別的型號偏偏就是不將老相好放入行李……結果在巴撒隆拿逛到第二天也忍不住搵間Footlocker買返對救命,好在是個非常common的款,去的又是大城市所以也不是折騰好久。

呀,還有,同一款也指定只要original的,改了配方的新版也不OK,比如那款波鞋近年狂出很多換了物料製造的「輕盈版」,我有次帶了去歐洲,第一天已頂唔順,因為新material彈性較低,穿平時一直在穿的same model same size突然卻變得很夾腳,要行行吓街返酒店換鞋。這也是不要立亂試新嘢的悲慘案例。

好像扯遠了,回到那個「唱舊歌得,咁點解著舊衫唔得?」的議題上,早前Kanye West不知從哪裏弄來一件2001年的Vintage Raf Simons迷彩外套穿著公開亮相了,馬上便有人拿出同款古董在網上拍賣,並以近40萬港元成交!

於是我想,如果陳奕迅2001年的《大開眼界》有人點唱,2005年的《浮誇》也令歌迷尖叫喝采,而且即使聽幾百次都聽極唔厭無人嫌佢「又翻炒」,為什麼2007年Moving on開場那套白色婚紗今日不可以攞返出來著,大家當經典來重新欣賞呢?點解又無未睇過,或者睇過但想睇多一次嘅人嘅呢?

難道世上就只有一個小鳳姐著條舊裙出場大家都齊鼓掌?

熱門文章

延伸閱讀

load more

© 2016 One Media Group Limited. All rights reserved.

地址:香港柴灣嘉業街18號明報工業中心A座16樓       電話:(852)3605-3705       傳真:(852)2898-2590

《明周》圖文均有版權,未經許可,不得轉載至任何印刷品或上載互聯網。如有侵權,本刊將循法律途徑追究。特此聲明。《明周》編輯部